Prentisiaethau Gwaith Coed

Beth yw Gwaith Coed?

Gwaith coed yw un o’r crefftau adeiladu hynaf. Mae coed a phren yn cael eu torri a’u huno i greu gosodiadau, ffitiadau ac elfennau adeiladu strwythurol. Mae prentisiaeth yn ffordd boblogaidd o ddod yn saer coed oherwydd gallwch ddysgu sgiliau gwaith coed ac ennill cyflog ar yr un pryd.

Carpenters working on building site marking wood to be cut

Sut mae prentisiaethau gwaith coed yn gweithio?

Mae prentisiaeth gwaith coed a saernïaeth Lefel 2 yn cael ei threulio’n gweithio gyda chyflogwr, lle mae prentisiaid yn cael hyfforddiant ar y sgiliau y bydd eu hangen arnynt i weithio fel saer safle neu saer pensaernïol. Mae prentisiaeth amser llawn yn debyg i swydd amser llawn – mae prentisiaid gwaith coed yn ennill cyflog. Gallwch ddisgwyl gweithio tua 30 awr yr wythnos, yn ogystal â diwrnod o astudio mewn coleg neu gyda darparwr hyfforddiant.

Pa mor hir yw prentisiaethau gwaith coed?

Mae’r brentisiaeth gwaith coed a saernïaeth Lefel 2 yn rhaglen 24 mis.

Faint o gyflog fydda i’n ei gael fel prentis gwaith coed?

Fel prentis gwaith coed, mae gennych hawl i gael eich talu o leiaf yr Isafswm Cyflog Cenedlaethol neu’r Cyflog Byw Cenedlaethol - mae lefelau hyn yn dibynnu ar eich oedran.

Mae prentis gwaith coed yn cael ei dalu am y canlynol:

Ei oriau gwaith arferol
Hyfforddiant sy’n rhan o’i brentisiaeth
Astudio tuag at gymwysterau mathemateg a Saesneg os ydyn nhw’n rhan o’ch prentisiaeth

Hefyd, mae gennych hawl i’r isafswm lwfans gwyliau o 20 diwrnod y flwyddyn ynghyd â Gwyliau Banc.

Pa fathau o brentisiaethau gwaith coed sydd ar gael?

Yn Lloegr, prentisiaeth saer coed a saernïaeth Lefel 2 yw’r safon y mae’n rhaid i seiri coed ei chyrraedd cyn dod yn saer safle neu’n saer coed cymwys. Mae amrywiaeth o gymwysterau prentisiaeth Lefel 3 (uwch) sy’n caniatáu ar gyfer arbenigo mewn maes penodol o waith coed, gan gynnwys gwaith coed crefft a saernïaeth.

Mae’r llwybr prentis i yrfa mewn gwaith coed a saernïaeth yn yr Alban drwy Brentisiaeth Fodern Lefel 3 mewn Adeiladu: Adeiladau.

Yng Nghymru, prentisiaeth saer coed a saernïaeth Lefel 2 yw’r safon y mae’n rhaid i seiri coed ei chyrraedd cyn dod yn saer safle neu’n saer coed cymwys. Mae amrywiaeth o gymwysterau prentisiaeth Lefel 3 (uwch) sy’n caniatáu ar gyfer arbenigo mewn maes penodol o waith coed, gan gynnwys gwaith coed crefft a saernïaeth.

Beth fyddwch chi’n ei ddysgu yn ystod prentisiaeth gwaith coed?

Bydd prentisiaid gwaith coed yn dysgu sut mae cyflawni’r tasgau canlynol yn ystod eu prentisiaeth, drwy eu hyfforddiant ffurfiol a thrwy gysgodi eu cydweithwyr ar safleoedd adeiladu ac mewn gweithdai:

Gweithio’n unol â safonau iechyd a diogelwch ac amgylcheddol
Mesur, marcio, gosod allan
Torri, siapio, gosod a gorffen pren
Y ffics cyntaf a’r ail ffics
Dewis, cynnal a chadw, defnyddio a storio offer llaw ac offer pŵer
Gosod distiau llawr, lloriau, trawstiau to a pharwydydd waliau
Gosod eitemau tu mewn fel grisiau, drysau, sgyrtin, cypyrddau a cheginau
Gosod fframiau ar gyfer pontydd, ffyrdd, argaeau ac adeiladau
Tynnu llun a gweithio gyda lluniadau technegol
Dysgu am wahanol fathau o bren a’u defnydd
Cynnal mannau gwaith diogel
Amcangyfrif faint o ddeunyddiau sydd eu hangen

Y cymwysterau sydd eu hangen i fod yn saer

Nid oes unrhyw ofynion mynediad ffurfiol ar gyfer prentisiaid gwaith coed yn Lloegr, ond dylai ymgeiswyr feddu ar Sgiliau Swyddogaethol Lefel 1 mewn Saesneg a Mathemateg.

I fod yn saer coed neu’n saer yn yr Alban, mae angen i chi fod wedi cwblhau’r Brentisiaeth Fodern mewn Adeiladu: Adeiladau. Bydd y meini prawf mynediad ar gyfer y brentisiaeth Lefel 3 hon yn amrywio o gyflogwr i gyflogwr, ond efallai y bydd rhai yn gofyn am 4 neu 5 o gymwysterau Cenedlaethol mewn Saesneg, Mathemateg, pynciau gwyddoniaeth a phynciau technoleg ymarferol, neu Sgiliau ar gyfer Adeiladu Gwaith ar Lefel 4/5 SCQF.

Nid oes unrhyw ofynion mynediad ffurfiol ar gyfer prentisiaid gwaith coed yng Nghymru, ond dylai ymgeiswyr feddu ar Sgiliau Swyddogaethol Lefel 1 mewn Saesneg a Mathemateg.

Bydd pob lefel o brentisiaeth gwaith coed yn gofyn i brentisiaid weithio ar safleoedd adeiladu, lle bydd angen cerdyn Cynllun Ardystio Sgiliau Adeiladu (CSCS) arnynt.

Y sgiliau sydd eu hangen i fod yn saer

Dylai ymgeiswyr am brentisiaethau gwaith coed a saernïaeth fod yn dda gyda’u dwylo, mwynhau gwneud pethau, gweithio gydag offer a pheiriannau a meddu ar rai sgiliau dylunio sylfaenol. Dylai seiri safle fod yn barod i weithio ym mhob tywydd.

Y rhagolygon ar gyfer y dyfodol a chamu ymlaen yn eich gyrfa

Yn gyffredinol, mae pobl sy’n dilyn prentisiaethau gwaith coed yn mynd ymlaen i gael gyrfaoedd fel seiri safle a seiri pensaernïol. Mae seiri safle, fel mae’r enw’n ei awgrymu, yn gweithio ar y safle neu mewn adeiladau domestig a masnachol yn bennaf, gan osod cydrannau pren pwrpasol fel drysau, grisiau, toeau a distiau. Mae seiri pensaernïol yn gweithio oddi ar y safle mewn gweithdy yn bennaf, gan greu elfennau pwrpasol fel drysau, fframiau ffenestri, grisiau a phaneli.

Gall seiri coed profiadol fod yn oruchwylwyr safle, yn rheolwyr prosiectau adeiladu, neu symud i faes rheoli contractau, amcangyfrif adeiladu neu feysydd arbenigol o waith coed fel adfer treftadaeth. Yn y pen draw, mae llawer o seiri coed hyfforddedig yn dod yn hunangyflogedig ac yn rhedeg eu busnes gwaith coed eu hunain. O ran enillion, gall uwch seiri, seiri siartredig neu seiri meistr ennill £30,000 - £45,000 neu fwy.

Sut i wneud cais am brentisiaeth gwaith coed

Os oes gennych chi ddiddordeb mewn gwneud cais am brentisiaeth gwaith coed, un o’r pethau gorau i’w wneud yw chwilio am swyddi gwag sy’n cael eu cynnig gan gwmnïau adeiladu lleol. Chwiliwch ar wefannau swyddi a defnyddiwch wasanaeth prentisiaethau y llywodraeth. Os ydych chi wedi cael rhywfaint o brofiad gwaith blaenorol mewn cwmni, gofynnwch a yw'n cyflogi unrhyw brentisiaid newydd. Bydd yn rhaid i chi wneud cais am unrhyw rôl brentisiaeth, felly bydd angen i chi lunio CV, ysgrifennu llythyr eglurhaol a mynd i gyfweliad.

Rhagor o wybodaeth am rôl saer

Gallech:

Darllen ein proffil swydd saer
Darllen am y gwahanol fathau o waith coed.
Darllen ein proffil swydd saer coed

Ble i ddod o hyd i brentisiaethau gwaith coed?

Dewiswch un o’r safleoedd postio swyddi isod i ddod o hyd i brentisiaethau gwaith coed yn Lloegr, Cymru a’r Alban.