Cynghorydd amgylcheddol

Beth ydych chi’n ei hoffi am eich swydd? 

Rydw i wir yn mwynhau’r amrywiaeth o brosiectau rydw i’n gweithio arnyn nhw; rydw i’n cael gwneud llawer o wahanol bethau ac yn gweithio ar draws y busnes. Rydyn ni’n gweithio mewn rolau cenedlaethol yn ein tîm felly rydyn ni’n mynd ledled y wlad i ymweld â’n safleoedd a’n swyddfeydd, sy’n wych oherwydd dydw i byth yn teimlo bod gen i swydd undonog wrth ddesg!

Sut beth yw eich diwrnod gwaith? 

Mae fy niwrnodau gwaith yn amrywiol, rydw i naill ai yn ein prif swyddfa neu yn ein swyddfa yn Llundain yn mynychu cyfarfodydd ac yn gweithio ar brosiectau neu efallai y byddaf ar y safle yn siarad â’r timau safle am ein targedau Cynaliadwyedd, a ffyrdd o’u cyflawni. Mae gen i waith gweinyddol i’w wneud, ond mae hynny’n wir am bob swydd, ond nid yw’n cymryd fy holl amser, ac mae digon o amser i ganolbwyntio ar brosiect cyffrous a’i gyflwyno ar draws y busnes. 

Pa sgiliau sydd eu hangen arnoch yn eich swydd? 

Angerdd, uchelgais a phenderfyniad! Mae’r rôl yn rhoi llawer o foddhad ac mae’n wych pan fyddwch chi’n mynd ar y safle ac maen nhw’n ymrwymo’n llawn ac yn awyddus iawn i wneud pob ymdrech i leihau eu hôl troed carbon! 

Beth oedd eich cefndir cyn dechrau eich rôl? 

Mae gen i Radd Meistr mewn Rheolaeth Amgylcheddol ac roeddwn i’n arfer gweithio i Ymddiriedolaeth Bywyd Gwyllt Llundain. Mi wnes i hefyd weithio dramor am flwyddyn i elusen cadwraeth forol. Mae gen i CV amrywiol ac rydw i wedi gwneud llawer o wahanol swyddi. Doedd gen i ddim profiad o’r diwydiant adeiladu cyn i mi ymuno â Wates, ond mae wedi bod yn hynod ddiddorol i mi ac mae’n ddiwydiant gwych i weithio ynddo. 

Beth ydych chi'n ymfalchïo ynddo fwyaf yn eich gyrfa? 

Rwy’n falch o’m llwyddiannau academaidd ac rwy’n falch o’m rôl bresennol. Dwi’n teimlo fy mod mewn lle gwych, yn gweithio i fusnes a fydd yn fy nghefnogi yn fy ngyrfa ac yn fy helpu i gyflawni fy nodau datblygu. 

Ble rydych chi'n gweld chi eich hun ymhen deng mlynedd? 

Dydw i ddim yn siŵr eto – bydd rhaid aros i weld!

Unrhyw gyngor i rywun sy'n meddwl am yrfa yn y diwydiant adeiladu? 

Mae’n ddiwydiant gwych sy’n tyfu drwy’r amser, ac mae cynifer o gyfleoedd gwaith yn gysylltiedig â’r diwydiant adeiladu nad yw pobl yn gwybod amdanynt.

Mae Ruth Finlayson yn Uwch Ymgynghorydd Rheoli Amgylcheddol

Beth yw eich rôl bresennol a beth mae’n ei olygu?

Mae Rheolaeth Amgylcheddol yn yrfa amrywiol a phwrpasol, ac mae nifer o gyflogwyr yn sylweddoli bod angen ei blaenoriaethu er mwyn datblygu eu busnes.

Mae fy rôl yn cynnwys darparu cefnogaeth a hyfforddiant ar draws y cwmni mewn rheoli prosiectau amgylcheddol a systemau rheoli amgylcheddol.

Rwy’n darparu cymorth ar y safle ar gyfer gwahanol brosiectau peirianneg o bontydd a ffyrdd, i amddiffynfeydd rhag llifogydd.

Rwy’n cydlynu’r gwaith o reoli llygredd, rheoli gwastraff, effeithlonrwydd adnoddau, ecoleg a chadwraeth o’r cam dylunio i’r cam gweithredu, ac yn asesu a datblygu cyfleoedd datblygu busnes i lywio strategaethau amgylcheddol a chynlluniau gweithredu ar gyfer cleientiaid.

Yn ogystal â hyn, mae fy swydd yn golygu archwilio ac asesu a gweithio’n agos gyda chleientiaid i sicrhau eu bod yn cydymffurfio â deddfwriaeth amgylcheddol.

Rydw i hefyd yn paratoi ac yn cyflwyno ceisiadau am ganiatâd, yn asesu arolygon ecolegol ar effeithiau’r cynllun, ac yn darparu ar gyfer timau dylunio ac adeiladu.

Mae cyflwyno rhaglenni hyfforddi ynglŷn â chaniatáu, cydymffurfio a monitro ym mhob maes rheoli amgylcheddol hefyd yn allweddol i’m rôl.

Beth yw eich cefndir addysgol a sut wnaethoch chi ddechrau arni yn yr yrfa hon?

Roeddwn i’n gweithio mewn gwahanol swyddi, gan gynnwys rheoli bar, addysgu, y llywodraeth, gwirfoddoli dramor, a gwaith cyfreithiol cyn gwneud ail radd a newid fy ngyrfa.

Fy ngradd oedd BSc (anrhydedd) mewn Ffiseg a Gwyddor yr Amgylchedd ac ail BSc (anrhydedd) mewn Cadwraeth Amgylcheddol. Yna, cefais rywfaint o brofiad gwaith yn gweithio ym maes cadwraeth yn Affrica a gwirfoddoli gyda’r RSPB, BTCV, NARRS, BCT ac ERYC cyn cael swydd fel cynghorydd gyda chontractwr peirianneg sifil.

Dysgais yn y gwaith, cyn dod yn rheolwr amgylcheddol.

Mae fy ngyrfa amrywiol wedi fy ngalluogi i ddeall effeithiau ehangach rheoli amgylcheddol ac anghenion rhanddeiliaid.

Beth ydych chi’n ei hoffi am eich rôl?

Rydw i wir yn mwynhau amrywiaeth y prosiectau rydw i’n gweithio arnyn nhw.

Rydw i’n cael gwneud llawer o bethau gwahanol a gweithio ym mhob rhan o’r busnes.

Mae ein tîm hefyd yn cael ymweld â safleoedd a swyddfeydd ledled y wlad, sy’n wych. Rydw i’n lwcus iawn nad oes gan i swydd undonog wrth ddesg!

Mae adeiladu yn ddiwydiant lle mae amrywiaeth a newid. Rydych chi’n cael cyfle i wneud gwahaniaeth yn yr amgylchedd ar lawr gwlad, yn ogystal â sicrhau bod eich llais yn cael ei glywed ar lefel lywodraethol.

Gallwch chi ddylanwadu ar newid ac arloesi ar gyfer dyfodol ein gwlad a’i seilwaith, a gwella dealltwriaeth pobl o’r cysylltiad rhwng datblygu ac adnoddau byd-eang.

Beth yw diwrnod arferol?

Mae fy niwrnod gwaith yn amrywio yn dibynnu a ydw i ar y safle neu yn y swyddfa. Ar y safle, gallaf ddechrau tua 7.30am a chael fy ngalw i arwain trafodaeth am gynnydd cyn mynd ar daith o amgylch compownd y safle. Mae gen i hefyd ddigon o waith papur i’w wneud, gan gynnwys archwilio dogfennau gwastraff Dyletswydd Gofal, dogfennau atal llygredd a Dangosyddion Perfformiad Allweddol.

Ar ddiwrnod swyddfa, rwy’n gweithio o 9 tan 5 ac yn gweithio drwy restr ddyddiol o bethau i’w gwneud. Efallai y byddaf yn trefnu i gael rhai telegynadleddau gyda chleientiaid neu’n paratoi deunyddiau hyfforddi.

Pa sgiliau yw’r rhai mwyaf hanfodol ar gyfer eich swydd?

Mae angen gradd sylfaenol mewn disgyblaeth sy'n ymwneud â'r amgylchedd, sgiliau da wrth ysgrifennu adroddiadau a gallu siarad â phobl ar bob lefel mewn ffordd gadarnhaol a phendant.

Mae angen i chi fod yn hyderus yn y ddeddfwriaeth a’r polisi sydd angen, bod yn frwdfrydig dros yr amgylchedd, deall y pwysau ar newid yn yr hinsawdd a bod yn barod i ddysgu am y rhanddeiliaid a’r sbardunau ar gyfer newid.

Mae’n helpu os ydych chi’n gallu dal eich tir. Wedi’r cyfan, mae’n rôl heriol a bydd yn rhaid i chi ddelio â digon o anghytuno. Mae’r gallu i ddylanwadu ar y broses o wneud penderfyniadau yn werthfawr.

Beth ydych chi'n ymfalchïo ynddo fwyaf yn eich gyrfa? 


Rydw i wedi mwynhau llawer o’m gyrfa ym maes rheoli’r amgylchedd, ac wedi gweithio ar brosiectau gwych, yn fwyaf diweddar ar forlyn llanw Bae Abertawe. Rydw i wedi gorfod dysgu’n gyflym i gymryd rhan mewn prosiect arloesol o’r fath ar gyfer ynni adnewyddadwy, ond mae wedi bod yn werth chweil.

Ble rydych chi'n gweld chi eich hun ymhen 10 mlynedd?

Rydw i’n gobeithio y byddaf gyda’r un cwmni’n arwain tîm rheolaeth amgylcheddol a chydymffurfiaeth gyfreithiol.

Rwy’n mwynhau’r amrywiaeth o waith ymgynghori, ac mae gallu gweithio gyda chymaint o wahanol gleientiaid yn golygu nad yw byth yn mynd yn ddiflas.

Pa gyngor sydd gennych chi i rywun sy’n ystyried ymuno â’r diwydiant adeiladu?

Bod yn barod i ddysgu yn y gwaith. Does dim angen i chi fod yn arbenigwr ar ddulliau adeiladu er mwyn gallu rheoli agweddau ac effeithiau amgylcheddol.

Ond mae angen i chi fod yn groendew, bod yn bendant ac – yn bennaf oll – mwynhau’r hyn rydych chi’n ei wneud.