Dodrefnwr siopau

Sut i fod yn ddodrefnwr siopau

Mae sawl ffordd o ddod yn ddodrefnwr siopau. Gallech ddilyn cwrs coleg, prentisiaeth, neu wneud cais yn uniongyrchol i gyflogwr.

 Dylech ymchwilio i’r llwybrau hyn i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Coleg/darparwyr hyfforddiant

Efallai y bydd eich coleg neu'ch darparwr hyfforddiant lleol yn cynnig cyrsiau a fydd yn eich helpu i ddechrau ar yrfa fel dodrefnwr siopau.

Darganfyddwch beth yw'r gofynion mynediad lle rydych chi'n byw.

• Dod o hyd i gwrs yn eich ardal chi
• Cyngor am gyllid
• Eglurhad o'r gofynion mynediad cyfatebol

Prentisiaeth

Mae prentisiaeth gyda chwmni adeiladu’n ffordd dda i ymuno â’r diwydiant. Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

Mae’n cymryd oddeutu dwy flynedd i gwblhau prentisiaeth ganolradd. Os gall eich cyflogwr roi'r profiadau iawn i chi, gallech symud ymlaen wedyn i gymhwyster Lefel 3 (uwch). Mae rhai dodrefnwyr siopau yn dechrau fel seiri coed neu asiedyddion ac wedyn yn arbenigo mewn dodrefnu siopau a chontractio mewnol.

Darganfyddwch beth yw'r gofynion mynediad lle rydych chi'n byw.

• Canllaw i brentisiaethau

Gwaith

Os oes gennych chi brofiad mewn teilsio, gwaith coed neu saernïaeth, efallai y gallwch chi wneud cais yn uniongyrchol i gyflogwr am swydd fel dodrefnwr siopau.

Oes oes gennych swydd yn barod, gallech gwblhau Diploma NVQ Lefel 3 mewn Galwedigaethau Gwaith Coed (yn y gwaith) i wella eich sgiliau.  

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel dodrefnwr siopau. Bydd darpar gyflogwyr bob amser yn falch o’ch gweld yn rhestru profiad gwaith ar eich CV. 

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel dodrefnwr siopau:

• Gwybodaeth dda am fathemateg
• Dealltwriaeth o adeiladu
• Yn drylwyr, gyda'r gallu i roi sylw rhagorol i fanylion
• Yn hyderus wrth weithio gyda’ch dwylo
• Yn gweithio’n dda fel aelod o dîm
• Y gallu i weithio dan bwysau
• Sgiliau dylunio
• Dealltwriaeth o brosesau gweithgynhyrchu a chynhyrchu.

Cymwysterau

Beth mae dodrefnwr siopau yn ei wneud?

Fel dodrefnwr siopau, byddwch yn gyfrifol am baratoi dyluniadau ar gyfer cleient, cyn eu hadeiladu yn y siop ar ôl iddynt gael eu cymeradwyo. 

Mae swydd dodrefnwr siopau yn cynnwys y dyletswyddau canlynol:

• Paratoi cynlluniau dylunio manwl
• Gwneud blaenau siopau, fframiau, unedau a ffitiadau gan ddefnyddio amrywiaeth o ddeunyddiau fel pren, metel, gwydr neu blastig ymysg pethau eraill
• Creu’r darnau mewnol ar gyfer y sectorau manwerthu, hamdden a threftadaeth, neu fanciau, bwytai a bariau
• Goruchwylio prosiectau a threfnu i isgontractwyr wneud y gwaith plastro, lloriau, gwresogi, goleuo ac ynysu rhag sŵn
• Amcangyfrif symiau a chostau deunyddiau
• Paratoi tendrau a dyfynbrisiau ar gyfer tasgau
• Mesur a marcio gwaith ar y safle
• Gweithio mewn gweithdai neu fusnesau cleientiaid mewn amodau swnllyd, llychlyd a chyfyng.

Faint o gyflog allech chi ei gael fel dodrefnwr siopau?

Mae’r cyflog disgwyliedig i ddodrefnwr siopau yn amrywio wrth i chi gael mwy o brofiad

• Gall dodrefnwyr siopau sydd newydd gael eu hyfforddi ennill £17,000 - £20,000
• Gall dodrefnwyr siopau hyfforddedig gyda pheth brofiad ennill £20,000 - £30,000
• Gall dodrefnwyr siopau uwch/meistr ennill £30,000 - £35,000.*

Mae cyflogau fel arfer yn amrywio yn ôl y lleoliad a goramser. Dodrefnwyr siopau hunangyflogedig sy’n gosod eu cyfraddau cyflog eu hunain.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi gwag diweddaraf ar gyfer dodrefnwyr siopau:

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel dodrefnwr siopau profiadol, gallech fod yn amcangyfrifwr neu’n ddylunydd.

Gallech symud i rôl oruchwylio, fel fforman, rheolwr prosiectau neu reolwr contractau. Gallech benderfynu dechrau eich busnes eich hun neu weithio fel is-gontractwr.