Gweithiwr twnelu

Sut i fod yn weithiwr twnelu?

Mae sawl ffordd o ddod yn weithiwr twnelu. Gallech chi ddilyn cwrs coleg, prentisiaeth, neu hyfforddiant yn y gwaith.

Dylech ymchwilio i’r llwybrau hyn i fod yn weithiwr twnelu i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Coleg/darparwyr hyfforddiant

Gallech gwblhau Diploma Lefel 2 arbenigol mewn Gweithrediadau Twnelu er mwyn dod yn weithiwr twnelu.

Darganfyddwch beth yw'r gofynion mynediad lle rydych chi'n byw.

• Dod o hyd i gwrs yn eich ardal chi
• Cyngor am gyllid 

Prentisiaeth

Gallech chi gwblhau prentisiaeth ganolradd gweithiwr twnelu gyda chwmni adeiladu i ddod yn weithiwr twnelu.

Bydd angen i chi gael 2 - 3 TGAU ar raddau 9 i 3 (A* i C), neu gymhwyster cyfatebol.

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

Darganfyddwch beth yw'r gofynion mynediad lle rydych chi'n byw.

• Canllaw i brentisiaethau

Gwaith

Os oes gennych chi rywfaint o brofiad sylfaenol fel labrwr, gallech chi wneud cais yn uniongyrchol i gwmni adeiladu i gael profiad ar safle fel gweithiwr twnelu. Gallech chi ddechrau arni fel cynorthwyydd i weithiwr twnelu mwy profiadol a symud ymlaen wrth i’ch galluoedd wella.

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio ym maes adeiladu. Bydd darpar gyflogwyr bob amser yn falch o’ch gweld yn rhestru profiad gwaith ar eich CV.

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel gweithiwr twnelu:

• Yn gyfforddus yn gweithio mewn mannau caeedig
• Sgiliau da o ran gweithio mewn tîm
• Sgiliau cyfathrebu da
• Ymwybyddiaeth o ganllawiau iechyd a diogelwch

Cymwysterau

Beth mae gweithiwr twnelu yn ei wneud?

Mae’r rhan fwyaf o weithwyr twnelu yn dechrau gweithio yn y pwll, gan dynnu pridd, creigiau a deunyddiau gwastraff eraill, cyn cymhwyso. Fel gweithiwr twnelu, efallai y bydd angen i chi weithio mewn mannau cyfyng am gyfnodau hir, gan fod rhai twnelau’n sawl cilometr o hyd.

Fel gweithiwr twnelu, gallech chi fod yn:

• Defnyddio cyfrifiaduron gyda meddalwedd rheoli adeiladu i helpu i sicrhau bod y gwaith yn rhedeg yn esmwyth
• Paratoi’r safle ar gyfer gwaith twnelu
• Trefnu bod yr holl offer yn cael ei ddanfon a’i storio
• Sicrhau bod y deunyddiau cywir ar gael i ddechrau gweithio
• Symud a thrin deunyddiau, adnoddau a chydrannau drwy ddulliau â chymorth mecanyddol neu â llaw
• Llwytho a dadlwytho, trin a chludo nwyddau a deunyddiau.

Faint o gyflog allech chi ei gael fel gweithiwr twnelu?

Mae’r cyflog disgwyliedig i weithiwr twnelu yn amrywio wrth i chi gael mwy o brofiad.

• Gall gweithwyr twnelu sydd newydd gael eu hyfforddi ennill £17,000 - £20,000
• Gall gweithwyr twnelu hyfforddedig gyda pheth brofiad ennill £20,000 - £25,000
• Gall uwch weithwyr twnelu ennill mwy na £25,000.*

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi gwag diweddaraf i weithwyr twnelu:

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel gweithiwr twnelu, gallech symud i rolau tebyg, a dod yn weithiwr drilio diemwnt, yn weithiwr drilio tir neu’n weithredwr peiriannau.

Gyda chymwysterau a hyfforddiant ychwanegol, gallech fod yn beiriannydd twnelu neu’n ymgynghorydd prosiectau.