Rheolwr dysgu a datblygu

Rwy’n gyfrifol am ddatblygu staff ar draws y sefydliad cyfan. Drwy arwain tîm o arbenigwyr dysgu a datblygu, rydym yn sicrhau bod unigolion yn gallu cael gafael ar amrywiaeth o atebion hyfforddi er mwyn cyflawni eu rôl yn effeithiol a datblygu eu gyrfa.

Beth ydych chi’n ei hoffi am eich swydd?

Rydw i wrth fy modd gyda’r amrywiaeth mae fy swydd yn ei roi, o reoli a datblygu fy nhîm fy hun i ddarparu hyfforddiant a gweithio gydag uwch arweinwyr i adnabod a datblygu talent y dyfodol. Mae cymaint o wahanol gynlluniau a phrosiectau, dydi’r rôl byth yn aros yn ei hunfan.

Sut beth yw eich diwrnod gwaith?

Gall pob diwrnod fod yn wahanol, a gofynion y busnes a’r prosiect sy’n ei arwain. Dyma rai enghreifftiau o’r pethau rwy’n ymwneud â nhw:

• Rheoli, cefnogi a datblygu fy nhîm
• Cyflwyno cyrsiau arweinyddiaeth a hyfforddiant pwrpasol
• Cynllunio a datblygu cynlluniau hyfforddi i ddatblygu unigolion ar draws y busnes
• Rheoli prosiectau ar fentrau dysgu a datblygu ar gyfer y busnes
• Gweithio ar fentrau ar draws y diwydiant gydag adeiladwyr tai eraill

Er fy mod wedi fy lleoli yn ein Canolfan Hyfforddi Genedlaethol, lle rydym yn darparu’r rhan fwyaf o’n hyfforddiant, rwyf hefyd yn treulio amser yn ein hadrannau ledled y wlad yn gweithio gyda rheolwyr a chyfarwyddwyr.

Pa sgiliau sydd eu hangen arnoch yn eich swydd?

Oherwydd yr amrywiaeth sy’n cael ei gynnig gan y rôl, mae angen ystod o sgiliau. Does neb yn feistr ar bopeth, felly mae’n bwysig deall eich cryfderau a sut mae gwneud y defnydd gorau ohonynt. Rhai o’r sgiliau sydd wir yn bwysig yw arweinyddiaeth, creadigrwydd a rheoli prosiectau.

Mae arweinyddiaeth y tîm yn bwysig er mwyn creu diwylliant cadarnhaol lle gall y tîm ddarparu gwasanaeth rhagorol i’r busnes. Mae dysgu a datblygu yn golygu mwy na darparu hyfforddiant yn unig, mae angen i chi feddwl sut i wella pethau, creu syniadau newydd a herio’r hyn sydd ar waith ar hyn o bryd. Mae rheoli prosiectau yn sgil bwysig er mwyn sicrhau bod cynlluniau’n cael eu cyflawni’n brydlon ac yn llwyddiannus.  

Beth oedd eich cefndir cyn dechrau’r rôl hon?

Rwyf wedi gweithio ym maes dysgu a datblygu ers dros 10 mlynedd ac wedi treulio’r rhan fwyaf o’r amser hwn mewn cwmnïau yn y diwydiant adeiladu, neu’n gysylltiedig â’r diwydiant. Dechreuais mewn rôl weinyddol ac rwyf wedi gweithio fy ffordd i fyny i swydd reoli gan ennill sgiliau a phrofiad hanfodol ar hyd y ffordd. Rwyf wedi cymryd amser i fuddsoddi yn fy natblygiad fy hun gan gwblhau cymwysterau ac achrediadau i gefnogi fy mhrofiad.

Beth ydych chi'n ymfalchïo ynddo fwyaf yn eich gyrfa?

Mae’n anodd dewis un peth rydw i’n fwyaf balch ohono oherwydd fy mod wedi bod yn rhan o nifer brosiectau llwyddiannus, fel sefydlu adran a chael yr achrediadau cyntaf yn y diwydiant, ac rydw i wedi gweld pobl yn datblygu ac yn camu ymlaen oherwydd yr hyfforddiant a ddarparwyd.

Gall y rôl fod yn werth chweil ac rwy’n falch o’r gwahaniaeth y gallwn ni ei wneud i yrfaoedd pobl.

Ble rydych chi'n gweld chi eich hun ymhen 10 mlynedd?

Rydw i wedi bod yn lwcus i fod yn rhan o amryw o brosiectau ac wedi cael cyfleoedd gwych. Byddwn i wir yn hoffi parhau i herio’r hyn sy’n cael ei ystyried yn ddull traddodiadol o hyfforddi a symud y diwydiant adeiladu i fod yn ddiwydiant blaenllaw o ran datblygu pobl a darparu gyrfaoedd cyffrous.

Unrhyw gyngor i rywun sy'n ystyried dilyn gyrfa yn y diwydiant adeiladu?

Gall adeiladu fod yn ddiwydiant heriol ac anodd i weithio ynddo ond mae’n cynnig llawer o gyfleoedd i gael gyrfa amrywiol a diddorol. Os ydych chi’n barod i weithio’n galed a manteisio ar gyfleoedd, gall fod yn ddiwydiant gwerth chweil.

Mae Sarah Forbes yn Uwch Ymgynghorydd Hyfforddi a Datblygu gyda Robertson Group Limited

Beth mae eich rôl yn ei olygu?

Fi yw’r prif bwynt cyswllt ar gyfer hyfforddiant ar draws ein busnes ledled y DU, sy’n cyflogi dros 1,700 o staff.  Rwy’n sicrhau bod yr holl weithwyr, o labrwyr i gyfarwyddwyr, yn cael yr hyfforddiant sydd ei angen arnynt i wneud eu gwaith yn ddiogel ac hyd eithaf eu gallu.  Rwyf hefyd yn cydlynu datblygiad ein gweithwyr er mwyn eu helpu i gamu ymlaen drwy eu gyrfa.

Beth ydych chi’n ei hoffi am eich swydd?

Rwy’n mwynhau bod allan yn y busnes, yn ymweld â’n swyddfeydd a’n safleoedd a siarad â chyfarwyddwyr am sut gall y tîm hyfforddi ddiwallu anghenion pob un o’r gweithrediadau busnes.  Mae angen i mi hefyd gael y wybodaeth ddiweddaraf am ddeddfwriaeth y diwydiant a mwynhau mynd i seminarau i sicrhau bod ein busnes yn cael y wybodaeth ddiweddaraf am newidiadau yn y diwydiant.

Sut beth yw eich diwrnod gwaith?

Ar unrhyw ddiwrnod arbennig, gallwn fod yn fy swyddfa, ar safle neu’n ymweld â chydweithwyr mewn ardal arall.  Ble bynnag rwy’n mynd, rydw i’n canolbwyntio ar siarad â chydweithwyr am hyfforddiant a datblygu. Rwy’n casglu adroddiadau i’r cyfarwyddwyr ar hyfforddiant sydd wedi’i gwblhau ac yn edrych ar hyfforddiant y mae angen ei gynnal yn y dyfodol.  Rwy’n sicrhau bod y busnes ar y blaen i’n cystadleuwyr drwy nodi lle mae bylchau yn ein sgiliau.  Rwy’n gweithio gyda phartïon eraill i gyflwyno arferion a thechnegau hyfforddi arloesol i sicrhau bod ein staff ar y blaen i’w cymheiriaid yn y cwmnïau sy’n cystadlu â ni.

Pa sgiliau sydd eu hangen arnoch yn eich swydd?

Mae cyfathrebu gwych yn allweddol yn y rôl hon, ac mae angen i chi allu siarad ag aelodau o’ch tîm eich hun, a hefyd â rheolwyr ar bob lefel a’r gweithlu ehangach, yn ogystal â chwsmeriaid allanol.  Mae dealltwriaeth o’r diwydiant adeiladu a’r cynlluniau cardiau yn hanfodol.  Mae rheoli amser a gallu blaenoriaethu hefyd yn allweddol yn y rôl hon.

Beth oedd eich cefndir cyn dechrau’r rôl hon?

Ymunais â’r diwydiant adeiladu pan adawais yr ysgol a dechrau gweithio’n llawn amser fel clerc cyfrifon yn Morrison Construction. Penderfynais wedyn fy mod eisiau symud ymlaen â fy ngyrfa ac roeddwn yn ffodus i fod mewn sefyllfa lle gallwn roi’r gorau i weithio’n llawn amser i fynd i’r brifysgol, a graddiais gyda Gradd Anrhydedd mewn Gwyddorau Cymdeithasol a Rheolaeth.  Ers graddio, rwyf wedi treulio’r 14 mlynedd diwethaf yn gweithio i Fwrdd Hyfforddi’r Diwydiant Adeiladu (CITB).  Cefais ddau ddyrchafiad a threuliais y 10 mlynedd diwethaf yn helpu busnesau adeiladu o bob maint yn Ne’r Alban gyda’u hanghenion hyfforddi, dod o hyd i gyllid ac yn rhedeg Grŵp Hyfforddi.

Beth ydych chi'n ymfalchïo ynddo fwyaf yn eich gyrfa?

Pan gymerais yr awenau dros y Grŵp Hyfforddi yn CITB yn 2006, roedd yna grŵp bach o aelodau a oedd yn cyfarfod bob chwarter blwyddyn.  Roeddwn i’n gweithio’n agos gyda’r Grŵp hwn a phan adawes i, hwn oedd Grŵp Hyfforddi mwyaf cynhyrchiol yr Alban.  Roeddem ni’n cyfarfod yn fisol ac yn cael cyflwyniadau gan amryw o gyrff. Roedd gan y Grŵp noddwyr hefyd ac roedd y ddau Ffederasiwn lleol yn cymryd rhan hefyd.  Fel grŵp, roeddem yn cynnal dros 300 o ddiwrnodau hyfforddi bob blwyddyn ac yn y pen draw roedd Grwpiau Hyfforddi eraill yn ystyried mi ni oedd y Grŵp i anelu tuag ato.  Llwyddodd y Grŵp i gael y llwyddiant y mae’n cael heddiw yn sgil fy ymroddiad iddo, a’m cysylltiadau yn y diwydiant.

Ble rydych chi'n gweld chi eich hun ymhen 10 mlynedd?

Hoffwn aros yn y diwydiant adeiladu ond bod gen i dîm mwy o faint i ofalu amdano.  Hoffwn ymgymryd â mwy o gymwysterau, datblygiad personol a bod yn aelod o CIPD.

Unrhyw gyngor i rywun sy'n ystyried dilyn gyrfa yn y diwydiant adeiladu?

Gwnewch eich gwaith ymchwil, dysgwch am y rôl rydych chi am ei chael yn y diwydiant, a siaradwch â phobl sydd eisoes yn y rolau.  Mae adeiladu’n ddiwydiant gwych i weithio ynddo, gyda llawer o gyfleoedd i ddatblygu.