Swyddog marchnata a chysylltiadau cyhoeddus

Sut i fod yn swyddog marchnata a chysylltiadau cyhoeddus

Nid oes unrhyw ofynion mynediad penodol i fod yn swyddog marchnata a chysylltiadau cyhoeddus, ond gallech gwblhau cwrs prifysgol neu goleg, prentisiaeth neu hyfforddiant yn y gwaith i’ch helpu i baratoi ar gyfer eich gyrfa.

Dylech ymchwilio i’r llwybrau hyn i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu arnoch i fynd ar safle adeiladu gweithredol.

Prifysgol

Bydd angen i chi fod â gradd israddedig i fod yn swyddog marchnata a chysylltiadau cyhoeddus gyda rhai cyflogwyr. Dyma rai pynciau perthnasol: 

• Saesneg
• Marchnata a chyfathrebu
• Cysylltiadau cyhoeddus
• Hysbysebu
• Busnes a rheoli
• Seicoleg.

Gallech chi hefyd astudio pwnc sy’n berthnasol i ddiwydiant yr hoffech chi arbenigo ynddo, fel adeiladu neu TG.

Ar gyfer gradd israddedig, bydd angen y canlynol arnoch fel arfer:

• 5 TGAU ar raddau 9 i 4 (A* i C), neu gymhwyster cyfatebol, gan gynnwys Saesneg a mathemateg
• 2 - 3 lefel A, neu gyfwerth.

Coleg/darparwyr hyfforddiant

Gallech chi gwblhau cwrs coleg i’ch helpu ar eich taith i fod yn swyddog marchnata a chysylltiadau cyhoeddus, mewn pwnc perthnasol fel marchnata, cysylltiadau cyhoeddus, astudiaethau busnes neu seicoleg. 

Mae hefyd yn bosibl ennill cymwysterau Cysylltiadau Cyhoeddus gan gyrff proffesiynol fel y Sefydliad Siartredig Cysylltiadau Cyhoeddus (CIPR) , y Sefydliad Siartredig Marchnata (CIM) neu’r Sefydliad Addysg Cyfathrebu, Hysbysebu a Marchnata (CAM). 

• Eglurhad o’r gofynion mynediad cyfatebol
• Dod o hyd i gwrs yn eich ardal chi
• Cyngor am gyllid

Prentisiaeth

Gallech chi gwblhau prentisiaeth fel cynorthwyydd marchnata neu weinyddwr gyda chwmni adeiladu, i’ch helpu i fod yn swyddog marchnata a chysylltiadau cyhoeddus.

Neu, gallech chi fynd drwy’r Sefydliad Marchnata Siartredig (CIM) i ddod o hyd i brentisiaethau proffesiynol a fydd yn rhoi’r sgiliau sydd eu hangen arnoch chi i symud ymlaen yn yr yrfa hon.

Fel arfer, bydd angen i chi gael 4 - 5 TGAU ar raddau 9 i 4 (A* i C) a lefel A, neu gymhwyster cyfatebol, i fynd ar brentisiaeth.

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

• Canllawiau i brentisiaethau

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel swyddog cysylltiadau cyhoeddus. Bydd darpar gyflogwyr bob amser yn falch o’ch gweld yn rhestru profiad gwaith ar eich CV.

Efallai y gallwch chi gael profiad gwaith marchnata a chysylltiadau cyhoeddus drwy:

• Cysylltu ag adrannau cysylltiadau cyhoeddus ac asiantaethau marchnata i gael profiad gwaith
• Gwirfoddoli i hyrwyddo elusennau neu fusnesau lleol
• Ysgrifennu i gylchgronau myfyrwyr, papurau newydd neu orsafoedd radio
• Ysgrifennu blogiau neu gyfrannu at ffrydiau cyfryngau cymdeithasol busnes neu elusen.
  
  
• Dysgwch fwy am brofiad gwaith

Gwaith

Os oes gennych chi rywfaint o brofiad sylfaenol, gallech chi wneud cais yn uniongyrchol i gwmni adeiladu i gael profiad fel swyddog marchnata a chysylltiadau cyhoeddus. Gallech chi ddechrau fel cynorthwyydd i neu is-swyddog i swyddog marchnata a chysylltiadau cyhoeddus mwy profiadol a symud ymlaen wrth i’ch galluoedd wella.

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel swyddog marchnata a chysylltiadau cyhoeddus: 

• Gwybodaeth am gynhyrchu a chyfathrebu ar y cyfryngau
• Gafael cadarn ar yr iaith Saesneg
• Y gallu i weithio’n drylwyr a rhoi sylw i fanylion
• Dyfalbarhad a phenderfyniad
• Gallu gweithio’n dda gydag eraill
• Gallu derbyn beirniadaeth a gweithio’n dda dan bwysau
• Gallu i weithio ar eich liwt eich hun
• Yn gallu gwerthu cynnyrch a gwasanaethau
• Sgiliau cyfrifiadurol da.

Beth mae swyddog marchnata a chysylltiadau cyhoeddus yn ei wneud?

Fel swyddog marchnata a chysylltiadau cyhoeddus, byddwch yn gyfrifol am gyfleu negeseuon allweddol a hyrwyddo delwedd gadarnhaol o gwmni. Gall dyletswyddau o ddydd i ddydd gynnwys ysgrifennu datganiadau i’r wasg, cysylltu â’r wasg leol a chenedlaethol a chydlynu negeseuon sy’n ymddangos ar y wefan, ar gyfryngau cymdeithasol ac mewn print. 

Gall rôl swyddog marchnata a chysylltiadau cyhoeddus gynnwys y dyletswyddau canlynol: 

• Cynllunio a chynnal ymgyrchoedd a strategaethau cysylltiadau cyhoeddus
• Monitro barn y cyhoedd a’r cyfryngau am eich cleient neu eich cyflogwr
• Ysgrifennu a golygu datganiadau i’r wasg, taflenni, llyfrynnau, areithiau, cylchlythyrau, gwefannau a chynnwys cyfryngau cymdeithasol
• Defnyddio pob math o gyfryngau, gan gynnwys y wasg genedlaethol, ranbarthol a’r wasg fasnach, i adeiladu, cynnal a rheoli’r ffordd y caiff busnes ei bortreadu
• Cynrychioli eich cwmni mewn digwyddiadau
• Gweithredu fel llefarydd dros frand y cwmni
• Hyfforddi gweithwyr ar sut i ddelio ag ymholiadau gan y cyfryngau a chyfweliadau gyda’r wasg
• Datblygu perthynas waith dda gyda’r cyfryngau a chysylltu â’r wasg ynghylch straeon newyddion posibl
• Ysgrifennu a golygu cylchgronau mewnol, astudiaethau achos ac adroddiadau blynyddol
• Rheoli a diweddaru negeseuon cleient ar y cyfryngau cymdeithasol
• Creu a chydlynu cyfleoedd i dynnu lluniau
• Rheoli, trefnu a goruchwylio digwyddiadau
• Monitro cyhoeddusrwydd a sylw yn y wasg
• Comisiynu ymchwil i’r farchnad
• Cydlynu hysbysebion am dâl a rhai di-dâl.

Faint o gyflog allech chi ei gael fel swyddog marchnata a chysylltiadau cyhoeddus?

Mae’r cyflog disgwyliedig i swyddog marchnata a chysylltiadau cyhoeddus yn amrywio wrth i chi gael mwy o brofiad.

• Gall swyddogion marchnata a chysylltiadau cyhoeddus sydd newydd gael eu hyfforddi ennill £20,000 - £25,000
• Gall swyddogion marchnata a chysylltiadau cyhoeddus hyfforddedig gyda pheth brofiad ennill £25,000 - £45,000
• Gall rheolwyr marchnata neu gysylltiadau cyhoeddus uwch, siartredig neu feistr ennill rhwng £80,000 a £100,000.*

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi gwag diweddaraf ar gyfer swyddogion marchnata a chysylltiadau cyhoeddus:

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel swyddog marchnata a chysylltiadau cyhoeddus, gallech symud ymlaen i fod yn rheolwr neu gyfarwyddwr marchnata neu gysylltiadau cyhoeddus. 

Gallech chi hefyd drosglwyddo eich sgiliau i fod yn rheolwr datblygu busnes neu’n swyddog gweithredol marchnata digidol. 

Neu, gallech sefydlu eich hun yn hunangyflogedig a gweithio fel ymgynghorydd marchnata neu gysylltiadau cyhoeddus llawrydd.