Beth i’w wneud ar ôl TGAU – Ein canllaw diwrnod canlyniadau TGAU

Sut oedd diwrnod canlyniadau TGAU i chi?

P'un a ydych wedi cyflawni y tu hwnt i'r hyn yr oeddech yn gobeithio amdano, neu'n teimlo'n siomedig yn eich canlyniadau, efallai eich bod yn pendroni beth sy'n digwydd ar ôl TGAU. Allwch chi wneud prentisiaeth gyda'ch TGAU? Beth yw eich opsiynau ar ôl pasio? Beth yw’r camau nesaf os nad ydych chi’n cael y graddau TGAU roeddech chi eu heisiau?

Bydd dewisiadau ar gael i chi bob amser, yn enwedig mewn diwydiant fel adeiladu. Rydyn ni'n mynd i edrych ar rai o'r opsiynau yn seiliedig ar eich sefyllfa.

Wnes i basio!

Newyddion gwych! Mae yna wledd o opsiynau ar gael i chi nawr.

Lefelau A

Os ydych chi'n mwynhau'r ysgol ac astudio, yna Lefelau A  yw'r dewis nesaf amlwg. Os ydych chi'n ystyried mynd i'r brifysgol ymhen ychydig o flynyddoedd, yna bydd angen i chi gael rhai Lefelau A o dan eich gwregys. Ond hyd yn oed os ydych chi’n gobeithio dechrau gweithio neu ryw fath o hyfforddiant galwedigaethol pan fyddwch chi’n 18, nid yw Lefelau A yn wastraff amser. Mae nifer o brentisiaethau, gan gynnwys uwch brentisiaethau a gradd-brentisiaethau, sydd â chanlyniadau Lefel A penodol fel gofyniad mynediad. 

Prentisiaethau

Os ydych chi wedi pasio TGAU Saesneg a Mathemateg yna fe ddylech chi allu cael lle ar brentisiaeth, er y gall rhai cyflogwyr ofyn am TGAU mewn mwy o bynciau. Mae prentisiaethau yn cynnig cyfuniad o swydd gyda hyfforddiant ac astudio galwedigaethol, gan arwain at gymhwyster a gydnabyddir yn genedlaethol. Mae prentisiaethau fel arfer yn cymryd 1-3 blynedd i'w cwblhau ac yn eich paratoi ar gyfer byd gwaith. Byddwch yn cael cyflog fel swydd arferol ac efallai y cewch gynnig swydd ar ddiwedd eich prentisiaeth hyd yn oed.

Cyrsiau coleg

Efallai y gallwch ddilyn cwrs coleg i gael sgiliau yn y grefft neu'r maes y mae gennych ddiddordeb ynddo. Efallai na fydd yn rhaid i chi dalu am y cyrsiau hyn, yn enwedig os ydych o dan 24 oed a'u bod yn cyfateb i TGAU neu Lefel A.

Profiad gwaith

Mae cael profiad gwaith gyda chyflogwr yn ffordd wych o wella eich rhagolygon, hyd yn oed os ydych wedi llwyddo yn eich TGAU. Bydd gweithio yn ystod gwyliau'r haf, gyda'r nos neu ar benwythnosau yn creu argraff ar ddarpar gyflogwyr.

Nid yw fy ngraddau’r hyn yr oeddwn yn ei ddisgwyl

Peidiwch â phoeni, hyd yn oed os na chawsoch chi’r graddau TGAU roeddech chi eu heisiau, mae digon o opsiynau ar gael i chi o hyd.

Prentisiaethau

Fel y dywedwyd wrthych efallai yn yr ysgol, Mathemateg a Saesneg yw'r ddau bwnc sy'n darparu'r ystod ehangaf o gyfleoedd os byddwch yn eu pasio ar lefel TGAU. Fodd bynnag, nid yw popeth ar goll os ydych wedi methu TGAU Mathemateg a Saesneg. Gallwch gael eich derbyn ar gyfer prentisiaethau o hyd os oes gennych rinweddau eraill fel profiad gwaith. Efallai y bydd eich cyflogwr yn gofyn i chi gymryd yr hyn a elwir yn gymwysterau Sgiliau Gweithredol Lefel 1 mewn Mathemateg a Saesneg.

Rolau ar lefel mynediad

Nid oes angen cymwysterau ffurfiol ar gyfer rhai swyddi ym maes adeiladu. Gallwch ddysgu yn y swydd a chynyddu eich profiad gwaith mewn rolau lefel mynediad, fel llafurio neu weithio’r tir. Efallai y bydd eich cyflogwr yn gallu darparu hyfforddiant er mwyn i chi allu datblygu eich sgiliau a symud ymlaen yn eich gyrfa.

Ailsefyll arholiadau

Gallech bob amser ailsefyll rhai o'ch TGAU. Efallai y gallwch wneud hyn fel rhan o'ch prentisiaeth. Mae rhai prentisiaethau, fel y rhai ar Lefel 1, yn agored i bobl sydd wedi colli allan ar TGAU Saesneg a Mathemateg. Mae'r cyflogwr yn dal yn debygol o ofyn i chi ailsefyll yr arholiadau, ond efallai y bydd y brentisiaeth yn fwy addas ar gyfer myfyrwyr y mae'n well ganddynt weithio gyda'u dwylo neu ddysgu sgiliau ymarferol.

Fy TGAU a llwybrau gyrfa yn y dyfodol

Efallai bod mynd ymlaen i’r brifysgol yn rhywbeth rydych chi wedi’i ystyried, ond peidiwch â phoeni, does dim rhaid i chi wneud y penderfyniad hwnnw eto.

Archwilio gradd-brentisiaethau

Os yw bywyd prifysgol yn swnio’n hwyl, ond nad ydych chi’n hoffi’r syniad o gael mwy o amser yn yr ystafell ddosbarth mewn darlithoedd, yna gallai gradd-brentisiaeth fod yn ddelfrydol. Byddwch yn dal i dreulio cryn dipyn o amser yn gwneud gwaith ar y safle neu'n cysgodi, ond bydd y rhan ddysgu o'ch amser yn cael ei wneud mewn amgylchedd prifysgol. Mewn sawl ffordd, gellir ei weld fel y gorau o ddau fyd prentisiaethau a phrifysgolion.

A yw prifysgolion yn edrych ar TGAU?

Mae gan brifysgolion fwy o ddiddordeb yn y Lefelau A rydych chi wedi'u hastudio a'r graddau a gawsoch yn y rheiny. Felly does dim ots gormod am y pynciau TGAU a gymerwyd gennych. Bydd prifysgolion yn chwilio am raddau Lefel A da mewn pynciau perthnasol i'r cwrs y gwnewch gais amdano.

Archwilio rolau mewn adeiladu

Os ydych chi eisiau gweithio ym maes adeiladu ond ddim yn siŵr sut i ddechrau ar ôl eich canlyniadau TGAU, peidiwch â phoeni. Os ydych wedi pasio pwnc y mae gennych ddiddordeb arbennig ynddo, gallech ystyried mynd ar drywydd hynny ymhellach. Er enghraifft, os oes gennych chi ganlyniadau da mewn Daearyddiaeth, gallech chi ystyried rôl fel cynllunio tref neu adnoddau dynol. Os mai Ffiseg oedd un o’ch pynciau gorau, efallai y byddai gennych ddiddordeb mewn gyrfa mewn peirianneg, y gallech ei dilyn gyda phrentisiaeth neu drwy gwblhau Lefel A perthnasol ac yna gwrs prifysgol neu goleg.